Gastroparesis ဆိုတာ အစာအိမ်ကြွက်သား အလိုအလျောက်လှုပ်ရှားမှုမှာ ပြဿနာဖြစ်နေတာပါ။ ပုံမှန်အားဖြင့် အစာအိမ်ရဲ့သန်မာတဲ့ကြွက်သားက ဝင်လာတဲ့အစားအစာတွေကို အူလမ်းကြောင်းဆီ တွန်းပို့ပါတယ်။ ဒါပေမဲ့ Gastroparesis ဖြစ်တဲ့အခါမှာ အစာအိမ်လှုပ်ရှားမှုက နှေးကွေးလို့ပဲဖြစ်ဖြစ်၊ လုံးဝအလုပ်မလုပ်လို့ပဲဖြစ်ဖြစ် အစာအိမ်ထဲမှာ အစာတွေ အပြည့်မြန်လာပါတယ်။ အရှင်းပျောက်အောင် ကုသနိုင်တဲ့နည်းလမ်းမရှိပေမဲ့ ဆေးဝါး၊ အစားအသောက်ပြောင်းလဲခြင်းနဲ့ သက်သာအောင်ပြုလုပ်နိုင်ပါတယ်။
⚫ ရောဂါလက္ခဏာ
အများစုမှာ သိသာထင်ရှားတဲ့လက္ခဏာမရှိပေမဲ့ တချို့မှာ အောက်ပါလက္ခဏာတွေရှိနိုင်ပါတယ်။
▪️အန်ခြင်း
▪️ပျို့ခြင်း
▪️ဗိုက်ပြည့်အင့်ခြင်း
▪️ဗိုက်နာခြင်း
▪️နည်းနည်းပဲစားရုံနဲ့ ဗိုက်ပြည့်ခြင်း
▪️အစောပိုင်းက စားထားတဲ့ မကြေသေးတဲ့အစာတွေ ပြန်အန်ခြင်း
▪️အစာခြေရည် ဆန်တက်ခြင်း
▪️သွေးတွင်းသကြားဓာတ် ပြောင်းလဲခြင်း
▪️အစားစားချင်စိတ်မရှိခြင်း
▪️ကိုယ်အလေးချိန်ကျခြင်း၊ အာဟာရမပြည့်ဝခြင်း
⚫ ဖြစ်စေတဲ့အကြောင်းအရင်း
ဘာကြောင့်ဖြစ်လဲ သေချာမသိပေမယ့် တချို့သူတွေမှာ အစာအိမ်ကိုထိန်းချုပ်တဲ့အာရုံကြော (Vagus nerve) ထိခိုက်ပျက်စီးတာကြောင့် ဖြစ်နိုင်ပါတယ်။ ပျက်စီးသွားတဲ့အာရုံကြောက အစာအိမ်ကြွက်သားကို အချက်ပြမှုတွေ ပုံမှန်မပို့လွှတ်နိုင်တော့ပါဘူး။ ဒီလိုနဲ့ အစာအိမ်လှုပ်ရှားမှုနှေးပြီး အစာအိမ်မှာ အစာတွေစုပုံပြီး ကြာနေပါတော့တယ်။
Vagus nerve ပျက်စီးခြင်းက ဆီးချိုလိုရောဂါတွေကြောင့်ဖြစ်နိုင်သလို အစာအိမ်၊ အူလမ်းကြောင်း ခွဲစိတ်မှုတွေကြောင့်လည်းဖြစ်တတ်ပါတယ်။
အောက်ပါအခြေအနေတွေမှာ ဖြစ်နိုင်ခြေပိုများပါတယ်။
▪️ဆီးချိုရှိခြင်း
▪️ဗိုက်/အစာရေမျိုပြွန် ခွဲစိတ်မှုပြုလုပ်ဖူးခြင်း
▪️ဗိုင်းရပ်စ်ကူးစက်ခံရခြင်း
▪️အစာအိမ်လှုပ်ရှားမှုနှေးကွေးစေတဲ့ ဆေးတချို့ (ဥပမာ – အပြင်းစားနာကျင်မှုသက်သာတဲ့ဆေး၊ စိတ်ကျဆေး)
▪️အရေပြားနဲ့ တွယ်ဆက်တစ်ရှူးတွေ မာကြောတောင့်တင်းစေတဲ့ရောဂါ (Scleroderma)
▪️အာရုံကြောရောဂါများ
▪️သိုင်းရွိုက်ဟော်မုန်းအားနည်းခြင်း
အမျိုးသမီးတွေက အမျိုးသားတွေထက် ပိုဖြစ်နိုင်ခြေများပါတယ်။
⚫ နောက်ဆက်တွဲ ပြဿနာများ
Gastroparesis က အောက်ပါနောက်ဆက်တွဲဆိုးကျိုးတွေဖြစ်စေနိုင်ပါတယ်။
▪️အဆက်မပြတ်အန်ခြင်းကြောင့် ရေဓာတ်ခမ်းခြောက်ခြင်း
