မိုးရွာလို့ပဲဖြစ်ဖြစ်၊ ဆောင်းအေးလို့ပဲဖြစ်ဖြစ် ချမ်းစိမ့်စိမ့်ဖြစ်လာတဲ့အချိန် အဖျော်ယမကာတစ်ခွက်လောက်သောက်လိုက်ရရင်ဖြင့် ချက်ချင်းနွေးသွားမှာပဲလို့ လူအများစုက ထင်ထားကြပါတယ်။ လက်တွေ့မှာလည်း တကယ်ပြုလုပ်ကြပါတယ်။ ဒါက တကယ်ရော မှန်ရဲ့လား။ လူတွေမသိထားတဲ့ ဘယ်လိုအန္တရာယ်မျိုးရှိနေမလဲ။ အစရှိတာတွေကို ဒီနေ့မှာ ရှင်းလင်းပြောပြသွားပါမယ်။
အရင်ဦးဆုံး ယမကာရဲ့ ဇီဝကမ္မအာနိသင်ကို စပြောပါမယ်။ အရက်ဟာ သောက်သုံးလိုက်တဲ့အခါ အရေပြားမျက်နှာပြင်မှာရှိတဲ့ သွေးကြောတွေကိုကျယ်သွားစေတယ်။ ဒီအခါ သွေးတွေခဏတဖြုတ်စီးဝင်လာလို့ အရေပြားမှာ ပူနွေးတဲ့ခံစားချက်ကိုရပါတယ်။ ဒါပေမဲ့ ဒါဟာ အပေါ်ယံပူနွေးမှုသက်သက်ပဲဆိုတာ သိထားဖို့အရေးကြီးပါတယ်။
လူတွေထင်ထားတာနဲ့ ဖြောင့်ဖြောင့်ကြီးဆန့်ကျင်ပြီး တကယ်တမ်းမှာ အရက်ဟာ ခန္ဓာကိုယ်တွင်းအပူချိန်ကိုကျဆင်းစေပါတယ်။ အရေပြားသွေးကြောတွေကျယ်ပြီး ကိုယ်ထဲက အပူတွေထွက်သွားလို့ ကိုယ်တွင်းအပူချိန်ကျပါတယ်။ အရက်ရဲ့ အပေါ်ယံပူနွေးတဲ့လှည့်ဖျားမှုကြောင့် ခန္ဓာကိုယ်ရဲ့ ကိုယ်အပူချိန်ထိန်းတဲ့လုပ်ငန်းစဉ် နှောင့်နှေးသွားတဲ့အခါ စိုးရိမ်စရာတွေဖြစ်လာနိုင်ပါတယ်။
◼️အေးတဲ့ရာသီဥတုမှာ ယမကာသောက်ခြင်းရဲ့အန္တရာယ်
ရာသီဥတုအေးလို့ အနွေးဓာတ်ရအောင် ယမကာသောက်ခြင်းမှာ ဆိုးရွားတဲ့နောက်ဆက်တွဲပြဿနာတွေ ရှိနေပါတယ်။ အကြီးမားဆုံးတစ်ခုကတော့ ကိုယ်အပူချိန်ကျဆင်းခြင်းပါပဲ။ အရက်ကြောင့်ဖြစ်တဲ့အပူဆုံးရှုံးမှုက ရာသီဥတုကြောင့်ကျဆင်းနေတဲ့ ကိုယ်တွင်းအပူချိန်ကို ထပ်မံကျဆင်းစေလို့ အသက်အန္တရာယ်စိုးရိမ်ရတဲ့အထိ ဖြစ်နိုင်ပါတယ်။
ဒါ့အပြင် အရက်က စဉ်းစားဆင်ခြင်နိုင်စွမ်း၊ ဆုံးဖြတ်နိုင်စွမ်း၊ ထိန်းချုပ်နိုင်စွမ်းကို ကျဆင်းစေလို့ အန္တရာယ်ရှိတဲ့အပြုအမူတွေကို ပြုမိနိုင်ခြေများပါတယ်။ အန္တရာယ်များတဲ့နေရာတွေကိုသွားခြင်း၊ လိုက်နာရမယ့်စည်းကမ်းတွေကို လျစ်လျူရှုခြင်း၊ ဟန်ချက်မထိန်းနိုင်ခြင်းတွေကြောင့် မတော်တဆမှုတွေ၊ ထိခိုက်ဒဏ်ရာတွေ ဖြစ်နိုင်ပါတယ်။
◼️အရက်သောက်မယ့်အစား ဒီလိုနွေးနွေးထွေးထွေးနေပါ
အရက်ထက်ပိုပြီး ဘေးကင်းထိရောက်တဲ့ နေထိုင်နည်းများစွာရှိပါတယ်။
▪️လုံခြုံပြီး အပူချိန်ကိုထိန်းထားနိုင်တဲ့ အဝတ်အစား၊ အသုံးအဆောင်တွေကို ဝတ်ဆင်ပါ။
▪️အာဟာရပြည့်ဝပြီး ပူနွေးတဲ့အစားအစာတွေကို စားသောက်ပါ။
▪️Herbal Tea ၊ စွပ်ပြုတ် စတဲ့အနွေးဓာတ်လည်းရ၊ ရေဓာတ်လည်းဖြည့်တဲ့ သောက်စရာတွေကို ရွေးချယ်ပါ။
▪️ကိုယ်လက်လှုပ်ရှားမှုတွေဖြစ်တဲ့ လမ်းမြန်မြန်လျှောက်ခြင်း၊ အားကစားပြုလုပ်ခြင်းစတာတွေကို ပြုလုပ်ပါ။
▪️အမိုးအကာအောက်မှာ နေထိုင်ပါ။
ဒါဆိုရင်တော့ ရာသီဥတုအေးရင် အနွေးဓာတ်ရအောင် အရက်သောက်ရမယ်ဆိုတဲ့ အယူအဆက မှားယွင်းမှုတစ်ခုဆိုတာ သိလောက်ပြီထင်ပါတယ်။ ခဏတာ အပေါ်ယံနွေးထွေးမှုက သင့်ရဲ့ကိုယ်တွင်းအပူချိန်ကို ကျဆင်းစေလို့ အန္တရာယ်သိပ်များလှပါတယ်။ ဒါကြောင့် ရာသီဥတုအေးခဲ့ရင် ထိရောက်ဘေးကင်းတဲ့အလေ့အကျင့်ကိုသာ လုပ်ဆောင်ကြဖို့တိုက်တွန်းလိုက်ပါတယ်။
