ဂရုပြုသင့်တဲ့ စိတ်ကျန်းမာရေး
စိတ်ကျန်းမာရေးဆိုတာက လူတစ်ဦးရဲ့ကျန်းမာရေးမှာ အရေးကြီးတဲ့အစိတ်အပိုင်းတစ်ခု ဖြစ်ပါတယ်။ လူသားတစ်ဦးရဲ့ကျန်းမာရေးလို့ဆိုလိုက်ရင် ခန္ဓာကိုယ်ကျန်းမာရေးတစ်ခုထဲကို ဂရုစိုက်နေရုံနဲ့မရဘဲ ကိုယ်ရောစိတ်ပါကျန်းမာမှ ပြည့်စုံတဲ့ကျန်းမာရေးအစစ်အမှန်ကို ရရှိနိုင်မှာပါ။ ဒီတစ်ခါမှာတော့ စိတ်ကျန်းမာရေးကို ဘယ်လိုဂရုစိုက်ရမလဲဆိုတာကို အနည်းငယ်ဆွေးနွေးပေးသွားမှာဖြစ်ပါတယ်။
စိတ်ကျန်းမာရေးက ဘာတွေအပေါ်မူတည်နေလဲ?
လူမှုဆက်ဆံရေး၊ စိတ်ခံစားချက်များဟာ ဘယ်လိုအချိန်မှာမဆို လူတစ်ဦးရဲ့စိတ်ကျန်းမာရေးအပေါ် သက်ရောက်မှုရှိစေတဲ့အချက်များဖြစ်ပါတယ်။ ဥပမာ- အကြမ်းဖက်ခံရတာတွေ၊ လူမှုရေး/ စီးပွားရေးအခက်အခဲများ ကြုံတွေ့ရတာတွေက စိတ်ဖိစီးမှုများစေပြီး စိတ်ကျန်းမာရေးကို ထိခိုက်စေနိုင်ပါတယ်။ ရုတ်တရက်လူနေမှုဘ၀ပြောင်းလဲသွားခြင်း၊ အလုပ်ခွင်အတွင်းစိတ်ဖိစီးမှုများပြားခြင်း၊ ကျားမခွဲခြားဆက်ဆံခံရခြင်း၊ ပတ်ဝန်းကျင်အသိုင်းအ၀ိုင်းမှ ဖယ်ကျဉ်ခံရခြင်း၊ ကျန်းမာရေးနဲ့မကိုက်ညီတဲ့နေထိုင်မှုပုံစံနှင့် ခန္ဓာကိုယ်ကျန်းမာရေးများဟာလဲ စိတ်ကျန်းမာရေးအပေါ်သက်ရောက်မှုရှိပါတယ်
စိတ်ကျန်းမာရေးထိခိုက်မှုမရှိအောင် ဘယ်လိုတွေကာကွယ်နိုင်သလဲ?
အဓိကကတော့ မိမိကိုထောက်ခံအားပေးတဲ့ပတ်ဝန်းကျင်တစ်ခုရှိဖို့အရေးကြီးပါတယ်။ စိတ်ကျန်းမာရေးကို မြှင့်တင်ပေးနိုင်တဲ့အရာတချို့ကတော့ …
- ကလေးဘ၀ထဲက စိတ်ဒဏ်ရာမရအောင် ကာကွယ်ပေးခြင်း
- အမျိုးသမီးများကိုခွဲခြားဆက်ဆံတာမျိုးမဟုတ်ဘဲ တန်းတူဆက်ဆံခြင်း
- သက်ကြီးရွယ်အိုများအတွက် အထီးကျန်မှုမရှိစေရအောင် ပံ့ပိုးကူညီပေးတဲ့ပတ်ဝန်းကျင်တစ်ခု ဖန်တီးပေးခြင်း
- ထိခိုက်လွယ်သူများအား လုံခြုံမှု၊ ကာကွယ်မှုပေးခြင်း
- ကျောင်းများမှာ စိတ်ကျန်းမာရေးမြှင့်တင်ပေးတဲ့အစီအစဉ်များ ပြုလုပ်ပေးခြင်း
- အလုပ်ခွင်အတွင်းစိတ်ဖိအားလျော့နိုင်သမျှလျော့နည်းအောင် စီစဉ်ပေးခြင်း
- အကြမ်းဖက်မှုများမှ ကာကွယ်ပေးခြင်း
- ဆင်းရဲမွဲတေမှု လျှော့ချသည့်အစီအစဉ်များဆောင်ရွက်ပေးခြင်း များပဲဖြစ်ပါတယ်။
စိတ်ကျန်းမာရေးထိခိုက်ပြီဆိုရင် ဘယ်လိုကုသရမလဲ?
စိတ်ဓာတ်ကျနေတဲ့သူများကို ပတ်ဝန်းကျင်မှ စိတ်ပိုင်းဆိုင်ရာဖေးမပြီး ပံ့ပိုးကူညီပေးတာမျိုး လုပ်ပေးလို့ရတဲ့အပြင် အရမ်းဆိုးဝါးတဲ့ စိတ်ဓာတ်ကျရောဂါခံစားနေရသူများကို ဆရာဝန်နဲ့ပြသတိုင်ပင်ပြီး ဆေးကုသပေးတာမျိုးပြုလုပ်ပေးနိုင်ပါတယ်။ စိတ်ရောဂါခံစားနေရသူများကိုလဲ ရှောင်ဖယ်မထားဘဲ ကုသမှုခံယူနိုင်အောင်အတတ်နိုင်ဆုံးကူညီပေးတာမျိုး၊ စိတ်ပိုင်းဆိုင်ရာအားပေးတာမျိုးတွေ ပြုလုပ်ပေးနိုင်ပါတယ်
စိတ်ကျန်းမာရေးထိခိုက်တယ်ဆိုတာက အားငယ်စရာကိစ္စမဟုတ်ဘဲ သက်ဆိုင်ရာ ကျွမ်းကျင်တဲ့ဆရာဝန်များနဲ့ ပြသပြီးဆွေးနွေးမှုခံယူသင့်ပါတယ်။
